خطية العادة السرية (الجزء الثانى)

ثانيا : الحلول الأيجابية :




اما المعالجة الأيجابية فهى معروفة وهى الحياه فى جو روحى كامل بعيد تماما عن هذا العالم الشرير :




أهم
حاجة تبدا بيها انك تدخل الاوضة بتاعتك وتقفل باباها وتقف قدام ربنا تكلمه
بكل صراحة عن ضعفاتك وتقوله انا نفسى أرجعلك يارب وأبقى كويس وارضيك وافرح
قلبك . انا يارب مش بخونك لما بعمل الخطية لكن انا ضعيف وبعملها غصب عنى .
بعملها عشان هى مسيطرة عليا مش عشان انا بحبها ..... (( صلى لربنا بكل
حاجة انت حاسسها ......))




وبعد لما تصلى جاهد لتنفيذ هذه النقاط :




1.
لازم اب اعترافك يحددلك قانون صلاة يومى من الأجبية ولازم تلتزم به امام
الله واب اعترافك واليوم اللى تخالف فيه القانون ده ولم تتممه كاملا يعتبر
عليك خطية ويجب ان تعترف بيها. لازم تفهم ان اهم حاجة فى الحياه الروحية
هى الصلاة ومفيش جهاد اعظم منها . هى الفضيلة الوحيدة اللى بتربطك بربنا .
وصدقنى لو تعودت الوقوف امام الله فى الصلاة هتخجل من انك تعمل الخطية .
أبدأ بقانون بسيط لكن لازم تبدأ ويكون لك قانون صلاة تنمو فيه مع الأيام.
" صلوا لكي لا تدخلوا في تجربة ( لو 22 : 40 ) "




2.
الأنتظام على الأعتراف على الأقل مرة شهريا وعايز اقولك حاجة مهمة . انك
لازم تعترف بكل شئ صغير وكبير وتثق ان كل خطية انت بتعترف بيها قدام ابونا
فى نفس اللحظة دى شيطان الخطية دى بيتحرق وبتتحرر منها لكن اى خطية انت
هتخجل تعترف بيها هتفضل مستعبد ليها . " ان اعترفنا بخطايانا فهو امين و عادل حتى يغفر لنا خطايانا و يطهرنا من كل اثم ( 1يو 1 : 9 ) "




3. التناول مرة فى الأسبوع على الأقل . التناول نعمة لا تقدر بمال وكل يوم موجودة قدامنا على المذبح خلاص لنفوسنا وارواحنا وأجسادنا " من ياكل جسدي و يشرب دمي فله حياة ابدية و انا اقيمه في اليوم الاخير ( يو 6 : 54 ) "




4.
قراءة الكتاب المقدس بصفة يومية وبأنتظام وبترتيب فى القراءات وليس قراءات
عشوائية . وتحويل هذا الكتاب إلى حياه . على الأقل تاخد ايه كل يوم من
قراءاتك وتحفظها وتحاول تطبيقها . وياريت كمان لو استعنت بتفاسير فى اى
جزء تقراه عشان القرأه بتفاسير بتكون أعمق واقوى " هلك شعبي من عدم المعرفة ( هو 4 : 6 ) "




5.
القراءات الروحية مهمة جدا وخصوصا فى سير القديسين والشهداء وخصوصا
القديسات والشهيدات عشان تقدر تعرف وتدرك ان فى نساء كتير عاشوا الطهارة
وعشان تساعد افكارك اللى تلوثت بالمناظر الجنسية ان المرأه مش مخلوقة
للجنس لكنها قدرت تبقى قديسة وشهيدة . " لهذا تضلون اذ لا تعرفون الكتب و لا قوة الله ( مر 12 : 24 ) "




6.
القراءة عن الأبدية والدينونة فأن الذى لا تربطه المحبة بالله قد يربطه به
الخوف . وان كان الخوف درجة أقل ولكنه يصلح ان يكون فى موضوعنا هذا كدرجة
إبتداء " رأس(بداءة) الحكمة مخافه الرب (مز 111: 10 )
" أقرأ عن الملكوت والموت والدينونة وعقوبة الأشرار أقرأ عن النفس ومصيرها
وحالتها فى مكان انتظارها . واحضر الجنازات وسير فى مواكب الموتى وعزى أسر
المنتقلين .. والأثر العميق الذى يتركه فى نفسك كل ده لا تضيعه سريعا
وانما استغله لتجلس إلى نفسك وتفكر فى مصيرك وتعمل أعمال تليق بالتوبة .




7.
اتفرج على افلام دينية كتير . سير القديسين والأفلام هتزرع فيك شهوة
للحياه المقدسة والعيشة زى القديسين . عايز اقولك ان الأفلام دى جميلة جدا
وبتوصلك حاجات مهمة مش ممكن تعرفها عن القديسين غير لو شفت افلامهم ...
كمان فايدة الأفلام الدينية انها هتغنيك وتحل مكان أفلام السينما الهيفة
بتاعت اليومين دول . " انظروا الى نهاية سيرتهم فتمثلوا بايمانهم ( عب 13 : 7 ) "




8.
الألتزام بكل صيامات الكنيسة طوال السنة . وتأكد ان الأيام اللى هتكون
صايم فيها دى هيا اقوى فترة روحية هتكون ليك لأن الصوم ده ذبيحة حب لربنا
. وخد بالك ان الصيام لازم يكون فيه فترة انقطاع عشان الصوم من غير أنقطاع
ميبقاش صوم . " ليس بالخبز وحده يحيا الانسان بل بكل ما يخرج من فم الرب يحيا الانسان ( تث 8 : 3 ) "




9.
واظب على حضور اجتماعات فى الكنيسة سواء اجتماع شباب او اجتماع عام لآنك
هتسمع فيها كلام ربنا وهتشترك فى مسابقات تشغل وقت كتير عندك وهتتعرف على
اصدقاء من الكنيسة ناس كويسين يساعدوك انك تلاقى أصدقاء حقيقين ويقربوك
لربنا اكتر. " لانه حيثما اجتمع اثنان او ثلاثة باسمي فهناك اكون في وسطهم ( مت 18 : 20 ) "




10.
حاول تشترك فى اى خدمة بسيطة فى الكنيسة على الأقل فى البداية لو مش متعود
على الخدمة . شوف خدمة مثلا مواعيدها مرة فى الأسبوع . بس لازم تخدم عشان
تخرج من القوقعة اللى انت عايشة فيها دى . " وحيث اكون انا هناك ايضا يكون خادمي ( يو 12 : 26 ) "




11.
أهتم انك دايما تشغل ترانيم فى البيت والحان ومزامير عشان دى بتطرد
الشياطين من البيت بدل ما تشغل الأغانى اللى ممكن تزرع فيك افكار تضرك
وتدخلك الشياطين . ثق انك طول ما انت بتعيش نفسك فى اى حاجة تبع العالم
يبقى الشيطان موجود معاك وشغال .




12.
التأمل أمام ايقونة لصليب رب المجد يسوع المسيح . ضع صورة كبيرة فى حجرتك
للسيد المسيح وهو على الصليب وتأمل فيها وكيف تحمل الأهانة والتعيير
والصلب لكى يعطيك حياه نقية جديدة وانت بجهلك لوثتها " مجروح لاجل معاصينا مسحوق لاجل اثامنا ( اش 53 : 5 ) "




13. اخر حاجة هقولهالك ودى اهم حاجة بقى اللى بيها هتقدر تحافظ على كل جهادك الروحى فى النقط السابقة
. انك لما تقرر التوبة والرجوع أكيد الشيطان مش هيسيبك خالص وهيفضل يحاربك
ويفكرك بالخطية ولذتها عشان ترجع تانى ويوقعك .. فعشان بقى تقاوم الحرب دى
من اولها وتتغلب عليها فى البداية لآنك لو سبت نفسك للفكر يستمر معاك
نهايتك هتكون السقوط .. ولذلك هقولك نصائح الشيخ الروحانى القديس يوحنا
سابا عن كيفية محاربة شيطان افكار النجاسة والشهوة من بدايتها عشان تقدر
تنتصر :




اول
لما تحس ان الشيطان بدأ يفكرك باى خطية ترسم نفسك بعلامة الصليب كتير وانت
بتردد بأسم الصليب باسم الصليب باسم الصليب كتير وكذا مرة تقولها




وترسم
علامة الصليب كمان على الأربع اركان الحجرة اللى انت قاعد فيها ولازم تثق
انك وانت بتعمل كده الشياطين اللى حواليك بتتحرق بالنار من علامة الصليب
الى بترسمها وكتير من اباء البرية كان ربنا بيفتح عيونهم ويخليهم يشوفوا
الشياطين وهى بتتحرق بالنار لما بيرسموا علامة الصليب عليهم




واثناء
محاربتك للشياطين دول وانت بترسم علامة الصليب على نفسك وعلى الحجرة
بأستمرار فى ثلاثة اشخاص لازم تنادى عليهم عشان يلحقوك وتتشفع بيهم




التلاتة دول : الملاك ميخائيل والشهيدة مارينا والشهيدة يوستينا




التلاتة
العمالقة دول بالذات كل الشياطين بتترعب بس من مجرد ذكر اساميهم عشان كان
ليهم مواجهات مباشرة مع الشياطين وسحقوهم فيها وخصوصا قوى الملاك ميخائيل
مرعب الشياطين. وتأكد ان اول لما تنادى عليهم هيجوا فى لحظتها ويربطوا كل
الشياطين اللى بتحاربك ويولعوا فيهم بالنار ويساندوك .




كمان
تردد اسم ربنا يسوع كتير (( ياربى يسوع ارحمنى انا الخاطي – ياربى يسوع
اعنى انا الخاطي – ياربى يسوع انقذنى انا الخاطي ........... ))




ومهم انك تسكب نفسك لربنا فى الصلاة وتطلب منه بلجاجة انه يرحمك ويرفع عنك عشان انت ضعيف محتاج معونتة وقوتة تسندك









عايز انبهك لحاجة مهمة كمان ..... انك كنت أبن للشيطان ودلوقتى انت عايز تكون ابن لربنا




ومش ممكن الشيطان هيسيب تعبه الفترة اللى فاتت دى كلها يضيع كده بسهولة لما تتوب وتبعد عن طريقه الدنس




عشان
كده الحرب الفترة الأولى دى هتكون عنيفة عليك . وانا مش بخوفك بالعكس انا
بقولك عشان تحضر نفسك كويس للحرب واقرأ الأيميل ده كذا مرة وركز فى نقاطه
وخصوصا نصايح القديس يوحنا سابا عشان لو التزمت بيها هتحافظ على حاجات
كتير قوى




انا
عارف ان كلامى صعب ومش سهل يتنفذ وعارف انك بتعمل الخطية غصب عنك عشان
نفسك تعمل الصح ومش قادر .. لكن ثق اننا بانفسنا ضعاف جدا لكن طالما بندخل
ربنا معانا فى كل حرب وبنادى عليه ونستغيث به أكيد مش هيسبنا نسقط لأننا
ولاده .




خليك
فى جهادك واثبت فيه إلى ان تنتشلك يد الله ... وثق ان ربنا شايف كل حاجة
وكل جهاد بتعمله من اجله وهو حافظه عنده ومش ناسيه وهيكافئك عليه .




لكن لو حصل وانت فى طريق جهادك وسقطت إياك نهائى من اليأس




إن كنت قد يئست من نفسك ، فإن الله لم ييأس من خلاصك









لا تيأس ابدا فى جهادك مهما بدت الحرب صعبة عليك




انا
عايزك وانت فى عز ضعفك وانت لسه عامل العادة السرية دلوقتى تقف تصلى
لربنا.. صدقنى دة اكتر وقت ربنا يستجيب فية. عارف لية ؟؟؟ لان شيطان اليأس
اللى هو اعظم شيطان فى الشياطين كلهم . مش بيجى للانسان غير بعد ما يقع
ويغلط وانت لما تقف تصلى بعد الخطية على طول بتهزم اقوى شيطان ممكن يسيطر
عليك ومش بس كدة دة انت بتاخد اكليل كمان بصلاتك لربنا وهو ((أكليل الرجاء)) شوفت ربنا دة حنين قد ايه .. الواحد يبقى لسة جارحه بخطيتة لكن مجرد انة يجى يكلمة.. ربنا يديله اكليل على طول .




وإياك
ان شيطان اليأس يزرع فيك افكار انك إزاى يكون لك وش تقف قدام ربنا وانت
لسه عامل الخطية واهانته . لازم تفهم ان ربنا مش بشر زينا عشان لما تغلط
فيه ميعبركش تانى لكنه أب حنون بيحب ولاده ولو ولاده غلطوا فيه بيستنى
يرجعوا يتأسفولوا مش ينفصلوا عنه خالص




وعلى
فكرة الكلام اللى بقولهولك دة مكتوب فى قصة فى كتاب(بستان الرهبان) كانت
قصة راهب متوحد فى مغارة وكل يومين تلاتة يجيلة الشيطان فى هيئة امرأة
جميلة ويغريه ويوقعة فى الزنا وبعد ما الشيطان يسيبة ويمشى ... الراهب
يركع ويصلى لربنا ويبكى بالدموع وكان فعلا بيقدم توبة حقيقية عشان ربنا
يساعده وكان الراهب ده يقول للشيطان لما يسيبه (( انت بتضرب بسلاح الزنا والنجاسة وانا بضرب بسلاح الرجاء فى رحمة ربنا لحد لما نشوف مين اللى هيكسب فى الأخر .. نجاستك ولا رحمة ربنا )) لكن بعد يومين يجيلة تانى الشيطان و يوقعة فى الزنا بسبب ضعفة ولما الشيطان يمشى ... الراهب يقف يصلى ويبكى بعد الشيطان مايخرج.. فضل على الحال دة 17 سنة .. تخيل !!! وبعد 17 سنة ظهر الشيطان للراهب دة على هيئتة الحقيقية السودا البشعة وقالة (( انت
اية يا أخى ... مش عايز تيأس من خلاص نفسك. انا خلاص قررت اسيبك لانى لو
استمريت معاك اكتر من كدة هديلك اكليل الرجاء بدل ما كنت جاى اخد منك
اكليل ابديتك )) ومن بعدها ربنا رفع عنه الحرب دى وعاش فى قمة الطهارة والعفة إلى ان تنيح بسلام .









+ معلومة مهمة
وأخيرة لازم تكون واثق فيها أثناء حربك وجهادك ان فى ملايكة وقديسين
كثيرين يتشفعون ويصلون لك دون ان تطلب منهم لآن كل ما يشغل السمائيين هو
ان الأرضيين يخلصوا " فقال لا تخف لان الذين معنا اكثر من الذين معهم ( 2مل 6 : 16 ) "




+
جهز نفسك من دلوقتى وقدس أفكارك وأعضائك حتى تستحق ان تلبس الثياب البيض
وتضرب بقيثارة الروح وترنم الترنيمة الجديدة أمام عرش النعمة مع كل
القديسين اللى سبقونا للسما تلك الترنيمة التى قال عنها يوحنا الحبيب أنه
لم يستطع احد ان يتعلمها إلا " الذين لم يتنجسوا مع النساء لانهم اطهار ، هؤلاء هم الذين يتبعون الخروف حيثما ذهب ( رؤ 14 : 4 ) "









بتمنى تستفيد بكل حرف فى الأيميل ده عشان ده فيه خلاص نفسك وعايزك تثق ان اللى كاتبلك الكلام ده ربنا بنفسه هو اللى بعتهولك انت شخصيا .




ربنا معاك ويحافظ عليك ويعوضك فى ملكوته

بجد مش عارفة اقول اية فعلا موضوع اكتر من رائع رائع رائع
واللى مش هيقرا الموضوع دة هيفوتة عمرة كلة
ميرسى فيرى

اتمنى ان كل الناس تقرأ الموضوع دة وتشارك برايها الموضوع مهم جداااااااااااااااااااااااااااااااااا

حقيقى موضوع جميل جدا


ربنا يبارك حياتك وخدمتك فيرى

يارب ارحمنا واعنا

مساء الخير
اولا انا احب اشكرك على الموضوع الجميل جدا جدا ده
بس احب بس اضيف كام حاجة كده
1-خطية العادة السرية دى مش بيعمهلها الشباب بس لأ الشباب والشابات
2-مينفعش اقول وانت ماشى فى الشارع متبصش لحد كده بعمله كبت لأ الحل ان النظرة تبقى طاهرة ومقدسة ودى بنعمة ربنا وبالصلاة لكن مش الحل انى اقول متبصش لحد
3-مينفعش الحل يبقى انى اقلل الجلوش على الكومبيوتر عشان كده -لتانى مرة-بيحصل كبت ومش ده ابدا الحل على كده اقول للراهب اما يبقى فى زيارات للدير ماتطلعش بره قلايتك ومتقفش فى المكتبة ولا الكانتين ولا تقعد على الكومبيوتر لأ ده مينفعش خالص انى اعالج المشكلة كده
4-اصحابى اللى انت بتقول اقطع علاقتى معاهم دول انا ممكن اخدهم معايا لطريق الخلاص واعرفهم مش انى اقطع علاقتى معاهم
5-موضوع اللحوم والشطة والأكلات دى احب اقولك ان دى كلها كلام فاضى وما أبتوش علمياً بصحة الكلام ده خالص يعنى الأكل ده مش ليه دعوة خالص بالشهوة زى ما كنا كلنا عارفين
6-ابعد عن جو العالم كده انا اللى بحط نفسى فى دايرة مغلقة لأن كده مش هتفاعل مع العالم هبقى وحييييييد والأفلام والأغانى عمرها ما كان غلط دى كلها فنون
7-الحلول الإيجابية مع السلبية مش السلبية الأول وبعد كدع الإيجابية
8-اخر حاجة وممكن محدش يقتنع بيها هما نقطتين ان الغلط مش فى العادة السرية وانما الغلط فى الأفكار اللى بتكمن ورا العادى دى
وثانياً ان اوقات كده ربنا بيفكرك بيها اما تس انك اتغلبت عليها وحسيت خلاص انك بار جدا ومش بتعمل ولا خطية ويجيلك غرور روحى ربنا بيجيلك ويفكرك ان كل انسان معرض للخطية والكلام ده من اب كاهن مش من عندى


اخيراً احب اشكرك بجد على المعلومات الحلوة خالص دى وربنا يعوضك

شكرا يا بيتر على ردك ومشاركتك بس بختلف معاك في عدة نقط

1-

اقتباس :

4-اصحابى اللى انت بتقول اقطع علاقتى معاهم دول انا ممكن اخدهم معايا لطريق الخلاص واعرفهم مش انى اقطع علاقتى معاهم

ماينفعش واحد مش بيعرف يعوم ينقذ واحد بيغرق لأن الاثنين هيغرقوا مع بعض, لما ترفع نفسك انت الاول تبقى ترفع معاك اصحابك لازم في الاول تكون اناني في خلاص نفسك, بعد كدة تبقى تحاول تنقذ اصحابك , لو زي مانت بتقول ممكن تنفصل او تقطع علاقتك بمصدر العثرة لأنك في البداية انت ضعيف مش هتقدر تقولهم لأ مش هعمل زيكم لأ مش هشوف معاكم . مش هتقدر ولو مقتنع بكدة يبقى بتضحك على نفسك. واثناء انقطاعك صلي ليهم معاك.
2-

اقتباس :

5-موضوع اللحوم والشطة والأكلات دى احب اقولك ان دى كلها كلام فاضى

اللي اعرفه ان الدهون واللحوم الدسمة بتثير الشهوة جداً والكنيسة بتنصحنا اننا في الصيام فرصة كبيرة اننا نترك العادة دي والاكل النباتي هيساعدنا على كدة ودي معروفة علمية وروحيا وتبقى تقرأ في كتاب بستان الروح عن الصوم.
3-

اقتباس :

والأفلام والأغانى عمرها ما كان غلط دى كلها فنون

لو زي مانت بتقول يبقى بردو الافلام الاباحية اللي على النت دي فنون علشان بيخرجوها ويمثلوها بطريقة تثير اللي بيتفرج عليها. ليه نعثر نفسنا في لقطات مثيرة ونقول دة فن. اذا كان الفن بيعثر فبلاش منه. نضحي بالقليل علشان نربح الكثير. لو الواحد بيحب الفن يتفرج فلى افلام القديسين القديسين اللي منهم القديس سمعان الخراز اللي فقع عينه لما شاف منظر عثره قال ادخل السما اعور احسن من لما مدخلهاش خالص وانا بعيني الاثنين. مبقولش نعمنل زيه احنا لسة موصلناش للقامة الروحية دي بس نعمل اللي نقدر عليه, نبعد ونعود نفسنا اننا مانرحش برجلينا لهلاكنا واننا نهرب لحياتنا ولخلاص نفسنا.
4-

اقتباس :

8-اخر حاجة وممكن محدش يقتنع بيها هما نقطتين ان الغلط مش فى العادة السرية وانما الغلط فى الأفكار اللى بتكمن ورا العادى دى

الغلط في الاثنين في الافكار وفي العادة نفسها في العادة نفسها لأنك بتستخدم حاجة مش في وقتها وبطريقة غلط ومش بالطريقة اللي خلقنا ربنا اننا نستخدمها فيها.هي بالضبط زي لما تقطف ثمرة قبل ما يكمل نموها وتذوقها وترميها.

اسف اني طولت في الرد وشكرا يا بيتر مرة تانية وممكن نفتح باب الحوار لكل الاعضاء لنفيد بعض

اللي انا اعرفه
ان اللحوم و الدهون فيها نسبة بروتين
زيها اغذيه تانية كتير
مفيدة و بتساعد الجسم علي تكوين المواد المطلوبة في الممارسات الجنسية

لكن مش معني كده ان اللي مش هياكل لحمة مش هاتجيله اي افكار شريرة
الخطية بتبدأ من المخ ... مش من اللمعده

للمهتمين
عندي برنامج روحي لمحاربة الشهوات دي بس بالأنجليزي
للي عاوزه .. يراسلني ع الخاص

ســـــــــــلام