الإرتباط شئ جميل جداً وأسمى عاطفة خلقها ربنا فينا هيا عاطفة الحب لكن للأسف الإنسان مسابش حاجة إلا لما بوظها ولوثها وخلى شكلها وحش حتى الحب بقى فيه غش وخداع وخيانة ومصلحة وحاجات كتير أوى
..
كل يومين فلان حب فلانة وإرتبطوا وكمان شوية ده طلع مش كويس ودى طلعت مش عارف إيه وهو يرتبط بعديها بيومين ببنت تانية صاحبتها عشان يغيظها تقوم هيا متغاظة ومرتبطة بالود أنتيمه وهلم جره وكل شغل تهريج وتلاعب بإسم الحب وخلاص
..
لازم نعترف إن 99% من حالات الإرتباط فاشلة وده بسبب الطرفين سواء الولد أو البنت ..وخلونا نقول الولد طالب فى جامعة والبنت زيه هيتخرج مش لاقى يآكل هيروح لأهلها ويرجع مكسوروهى فى الوقت ده هتكون بنت بابا وماما المطيعة اللى بتسمع الكلام وتقوله خد الدبدوب بتاعك وهات حاجتى وتتجوز وهو بعديها بسنتين وإلا اكتر يتجوز وممكن يقابلوا بعض وميعرفوش بعض .. ومن ده كتير وممكن نقول 100 قصة ورواية ..
أول شئ يا شباب لازم تعرفوا إن الشئ اللى بيتولد فى الضلمة عمره ما هيخرج للنور أبداً والشئ اللى بيبنى على أساس ضعيف بيفشل فى أغلب الأحيان لأنه مع الزمن بيضعف أكتر ومبيقدرش بعد كده يقف على رجليه.....
يعنى لو هنبدأ مسألة الحب لازم يكون فيه شرطين:
أن الحب ده يكون فى النور .. مش فى سينما وإلا كافيه من إياهم-1
2-ان يكون بمعلومية أهل الطرفين
:-خلينا نناقش المبدأ الأول
البنت لازم تكون فاهمة كويس إن الولد اللى بيحبها وما إحترمهاش زى اخته يبقى مبيبحهاش حب صفى نقى وطاهر .. يعنى لو هايتطور الموضوع لتصرفات غير سليمه وغير لائقه يبقي الولد ده لسه بيعيش سن مراهقة وبيحكمه الشهوة وليس الحب ..
ونحسبها كويس إسأل كل الشباب المرتبطين عن إخواتهم البنات وقوللهم ترضى أختك ترتبط أو زى ما بتعمل مع فلانة ترضى فلان يعمل مع أختك .. طبعاً الجواب محفوظ وكل واحد فيهم هيعمل شمشون وهيهد المعبد على اللى فيه لو حد مس شرف أخته بكلمة .. طاب البنت اللى إنتا بتحبها دى مالهاش كرامة وإحترام وقلب لازم تحافظ عليهم .. وإلا الحب بقي كلام فى التليفونات وخروجات ووقت المسؤلية .. كل واحد يجرى يشوف سكته إحنا مننفعش لبعض .. يبقى متجيش بنت تقوللى لو ممسكش إيدى هيبقى مش بيحبنى .. والولد كمان يقوللى كده.. يعنى من سماحة القرن ال 21 سايب كل الشباب يحب وينبسط بس على الأقل الشباب دول يحترموا آدميتهم ودينهم ونفسهم عشان مشوارهم ينتهى على خير ده إذا كانوا فعلاً بيحبوا بعض ما هياش شوية مراهقة إشباع عاطفى والسلام ..
المبدأ الثانى -2
البنت اللى مبتحترمش أهلها ومبتقدرش ثقتهم فيها تبقى مش هتحترمك ولا هتقدر ثقتها فيك .. إحنا عايزين نحط للإرتباط إطار إجتماعى موثوق يبقى ماشى فيه .. عن طريق الأهل عشان ميبقاش شئ تافه زى ما كله بيقول .. يبقى إنتى تقولى لوالدك ووالدتك
( شايفه حد هيكتبلى فى الرد أهلى صعايدة مش هيوافقوا )
أظن إحنا دلوقتى فى زمن مفيش ولد أو بنت بيتجوزوا غصب عنهم إلا ما يندر حدوثه .. يعنى بمعنى أصح إذا كان شاب كويس ومتدين وبتحبيه وماله لو تقولى لبابا أو ماما الأقرب ليكم وتعملوا حاجة قدامهم أحسن ما يكون من وراهم وأكيد هما هيحترموا رأيكم ومشاعركم وإحترامكم ليهم قبل كل شئ .. نيجى للناحية التانية خايفة تقول لباباها دلوقتى لأحسن هو عصبى وممكن يقعدها فى البيت . . طيب البنت دي اللي خايفه تقول لباباها وهما لسه علي البر امال لما الموضوع يطول شويه هايبقي ايه التصرف؟؟؟؟؟
برضه لازم يكون فى إحتياطات يبقى والدها عارف ظروفك وإمكانياتك عشان الموضوع ميفشلش فى الاخر وتقول يا ريت اللى جرى ما كان .. طاب هو مش عايز يقول لمامته لأحسن مامته عايزاه لبنت خالته .. يبقى ولد معندوش شخصية والمفروض يآخد اذن من مامته قبل ما ينزل وبعد كده يبقى يقول أنا عايز أرتبط وأحب حب بجد ..
الموضوع له ملابسات كتير أكيد هتبان من الردود وبينا كده نتناقش
لحد ما نوصل حل نقفل بيه مشروع الإرتباط الودى ونبدأ مشروع تانى ناجح وبنسبة أكبر إسمه مشروع الإربتاط الموثوق
اعلى كل موضوع بالمنتدى
موضوع: الإرتباط 
الأربعاء 22 أكتوبر 2008, 11:49 am
