من الثقافة الشرقية فى مصر

ياريت تشاركونى الرأى فى الموضوع
وأنا اخترت مصر لأن ده النموذج اللى أنا عايش فيه وشايفه بوضوح

دايماً نقول العادات الشرقية وتابعوا معايا إيه هى العادات
_الشهامة المطلقة _السماحة _الالتزام بالأداب العامة
نمسكهم بقى نقطة نقطة...
*************************
أولاً الشهامة المطلقة
____________
1- البنت فى الشارع: تعتبر أهم نقطة لأن فيها نصف المجتمع بيتأذى بسبب التحرشات والمعاكسات وخاصة فى المجتمع المصرى، تلاقى البنت ماشية متضايقة بسبب إن واحد بيضايقها سواء بمعاكسة خاصة إن كانت جارحة أو بأى إسلوب من أساليب التحرش وبيكون قدام الناس كلهم ( على عينك يا تاجر) ومش بنشوف حد بيتدخل... وأما حد بيتدخل لو ماكنش فتوة وجامد هاتحصل خناقة ويتضرب ويطلع غلطان ويقلوله ( انت مالك هى كانت قريبتك وإيه اللى ينزلها من بيتها) سبحان الله! فين الشهامة؟! حد يقولى

2- فاقد الأهلية: وعادة بيكون لا حول له ولا قوة لأنه غالباً بيكون طفل أو شخص من ذوى الاحتياجات الخاصة العقلية وتلاقى كام شاب فى قمة الهيافة والتفاهة بيضايقوه فى الشارع وتلاقى الشخص بيصرخ عشان حد ينجده ويدافع عنه.. رد الفعل بيكون إيه؟ ... إن الناس فى الشارع بيمشوا يتفرجوا ويضحكوا... إيه اللى بيضحك؟! شخص بلا قوة بيتأذى ومحدش بيتدخل وكمان بيضحكوا عليه فين الشهامة؟! الله أعلم

3- كبار السن: تلاقى واحد سنه كبير بيمشى براحة وهو مش قادر يجى مثلاً يركب مواصلة وتكون المواصلات زحمة تلاقى القوى يدخل ويزاحم ويدخل بالقوة وطبعاً الراجل الكبير فين وفين عقبال ما يقدر يركب ده لو عرف يركب فى يومه ولو قلت لحد ما خلتهوش يركب ليه وكمان انت زقيته يقولك مش عارف يمشى ويتصرف يعد فى بيتهم يخرج ليه وطبعاً نفس الكلام مع البنات وأغلب فاقدى الأهية بس هو يخص أكتر كبار السن... فين الشهامة؟! راحت فى الرجلين
وفى حاجات تانية كتير بس كفاية كدة دلوقتى بس أقول إن كدة الشهامة مش من صفات الرجل الشرقى ولكن الصفة الأكيدة بالنسبة للشهامة إما اللامبالاه أو الندالة وانا برجح التانية

ثانياً السماحة
_______
باختصار بتبان جداً فى المشاجرات بين الأطفال والمراهقين بس بجد حصل تطور جامد جداً وأنا بشوفه بنفسى...
الخناقات كانت قبل كدة بين المراهقين عامة وبعد كدة بيعقلوا دلوقتى بقى بتلاقى الخناقات بين الناس الكبار والبالغين وكما بقى أحياناً تلاقى الراجل من دول عنده فوق الستين ولا السبعين وساند طوله بالعافية ونازل يتخانق مش قادر يهدى نفسه مع إنه ذو خبرة عالية بالحياة بس تقول إيه

والتطور الجامد بقى فى الخناقات إنها أصبحت تتم بإيه؟! السكاكين والمطاوى بأنواعها المختلفة الشوم والسنج والسلاسل الحديد وأحياناً السلاسل دى بيبقوا مثبتين فيها حوالى عشر أمواس حلاقة عشان أما تنزل على حد لازم تشرحه
والجامد قوى بقى إن نسبة عالية من الشباب والبالغين وحتى الأطفال والمراهقين بيعملوا إيه؟! بقوا بيشيلوا معاهم أساسى مطوة أو موس فى فمه بين أسنانه... عشان يعمل حسابه لأى خناقة
شوفتوا السماحة عند الشرقى وصلت لفين؟!
طبعاً ده غير الخناقات اللى بتم بسبب مثلاً إن الأهلى كسب أو الزمالك كسب.......إلخ من أسباب جامدة فى قمة التفاهة

ثالثاً الالتزام بالآداب العامة
________________
1- مضايقة البنات: مش هاطول لأنه كان فى موضوع الشهامة
2- الألفاظ والشتايم: الحمدلله الشباب بقوا عندهم قدرة فى عمل وإعداد قواميس من الشتايم المختلفة لأ وإيه؟! تلاقى الواحد من دول لا يفقه شئ فى الانجليزى بس حافظ شتايم بالانجليزى... سبحان الله!
3- إحترام الكبير: كان زمان حتى وأنا صغير شوية تلاقى الطفل أو المراهق أو الشاب أما راجل كبير يقوله كلمة أو يوبخه على حاجة غلط عملها يقوله مثلاً آسف ياعمو مش قصدى ويمشى مكسوف فى نص هدومه من العملة
التطور بقى إيه؟ تلاقى الشاب لأ وكمان الطفل زى ما بيقوله الغلط راكبه من ساسه لراسه وبجح بجاحة فأما حد أكبر منه يكلمه حتى لو كان راجل كبير السن... وانت مال أهلك ... انت ما تعرفش انا ابن مين يا ابن ال......... بدون أدب وكأن الصغير مش بيعمل حاجة غلط ويتمادى فى غلطه
4- العطف على الصغير: تلاقى اتنين بيتخانقوا وواحد فيهم ماقدرش على التانى أو ماعرفش يضربه فيستنى أخوه الصغير عشان يضربه وأنا من يومين بالظبط شوفت واحد ماطلش يضرب جاره الصغير لأنه جرى منه راح داخل البيت بتاع جاره وضرب أمه واخواته البنات الكبار والصغيرين فطبعاً الحى كله هاج عليه راح الولد اللى ضرب البنات والأم طلع بيته وقفل الباب وأنا شايفه من الشباك - لأنى ساكن فى المقابل - بيجيب سنجه وبيطلعها من الجراب بتاعها زى السيف بالظبط واتصل بأخوه الأكبر منه اللى عدنه حاجة وتلاتين سنه وقاله إن فى خناقة مع الحى كله لو ماجيتش دلوقتى هانزل بالسنجه قاتل أو مقتول وتحس ان الولد زى مايكون بيدافع عن حاجة صح راح أخوه جاب حوالى 20 فلاح معاهم سنج وسكاكين بيهددوا أهالى الحى
5- بعض التشبيهات الخايبة: البنت دى بمائة راجل... كلام رجالة ولا كلام ستات... انت هاتتخانق معايا عشان واحدة بنت... دى مهما راحت أو جات بنت...مديرتك واحدة ست؟!ويضحك... وما إلى ذلك مش أمثلة كتييير على أساس إن الراحل هو أساس المقياس لكل شئ ومش حاطين إن الاتنين زى بعض بالظبط
6- رفض العادات الغربية: تلاقى الواحد من دول يقولك إيه... أعوذ بالله من الغرب واللى عايشين فى أوروبا وأمريكا دول بيشربوا خمرة وعندهم بيت دعارة... والحمدلله أنا أعتقد إن ما فيش بلد فيها تجار حشيش وحشاشين ومخدرات بكل أنواعها زى البلد دى (مصر أم الدنيا) وطالما أم الدنيا لازم تكون متفوقة حتى الحشيش
ده غير أغلب إن الناس فى مصر سواء أطفال أو شباب أو شيوخ سواء ذكورة أو إناث مش بيتعاطوا مخدرات وبس لكنهم بيشربوا بيرة وخمرة كتير عشان يتسطلوا... أنا مش عارف هيتسطلوا إيه أكتر من كدة
وعلى فكرة كتير من الناس اللى فى أوروبا أو أغلبهم بيكون هدف الخمور بالنسبة ليهم التدفئة مش عشان حاجة تانى

إيه رأيكم فى الثقافة الشرقية فى مصر... لو هى دى الثقافة الشرقية يبقى أى ثقافة تانية أفضل

مصر لسة بخير... من الثقافة الشرقية فى مصر Icon_question

شاركونى الرأى

يبقى انتى اكيد اكيد اكيد فى مصر
farao