جهاز تصحيح الأوضاع...!!

أتعلم..؟!

نعم أنت..!!

إقترب من هنا...لا لا تقترب إلى هذا الحد...إرجع إلى الوراء...نعم هكذا أفضل...ضع رأسك بوسط شاشة الكمبيوتر....إسمع الكلام بس....أيوة كده حلو قوي...إفرد ضهرك بقى...أيوة كده...حلو حلو..!!!

هتقرا دلوقتي كلام ليك أنت و بس...ماتحاولش تبص حواليك غير أما أقول لك....و ماتحاولش تحرك شفايفك و أنت بتقرا...أنا مش عايز أي حد يعرف أنت بتقرا إيه...

أقول لك...طلع كل إللى معاك في الأوضة..أو إتأكد على الأقل إن مافيش حد بيطل براسه من وراك عشان يعرف أنت بتقرا إيه....

بص حوالك و إتأكد كده إنك لوحدك...ها بصيت..؟!...كله تمام...

لو أنت دلوقتي لوحدك...إبتدي إقرا...لو لأ...إقرا كلامي أما تبقى لوحدك...أنا مش هبوس إيدك عشان تقراها و أنت لوحدك....

كله تمام و لا لسه..!؟...

كله تمام..؟!

أبتدي أتكلم و لا أستنى...

لو جاهز..انا كمان جاهز...

خليك معايا...و ركز في الكلام إللى جاى كويس قوي....

أنا هبتدي....

بس قبل ما أبتدي...ممكن أطلب منك طلب سخيف....!!!!

لو جنبك شباك...روح ناحيته...و إفتحه..و بص للسما....بصة واحدة بس أنا مش عايز أكتر من كده...يلا روح إعملها و أنا قاعد مستنيك هنا أهو.....

.

.

.

حمدالله على السلامة...معلش تعبتك...

نبتدي بقى ولا إيه...؟!

يلا...!!!!

ثري..!!

تو...!!!

وان..!!!

أهلاً بيك فى جهاز تصحيح الأوضاع...ماتبصش حواليك قلت....الجهاز ده إللى أنت لمدة قرايتك للكلام ده هتغير حاجات كتير قوي في حياتك...

طبعاً أنا ماعرفش الكلام ده هيغير فيك ولا لأ....بس حتى لو لأ...اديك جربت الجهاز و في أي وقت حبيت تستخدمه..أديك عرفت المطرح....بس جرب هتخسر إيه..؟!...

أول حاجة لتصحيح أوضاعك..هو تصحيح أوضاعك مع السما....أيوة السما إللى أنت لسه شايفها دي...

تعالى قرب كده...!!!

إيه أول حاجة جت في دماغك أما بصيت للسما..؟!

قول ماتتكسفش...إفتكر إن أنت لوحدك..و أنا مفضيلك الأوضة يا معلم...قول إللى أنت عايزه....ها جه إيه في دماغك...؟!

طب أنا هسيبك تقوم تبص بصة تانية و ترجعلي تقول لي حسيت بإيه..؟!...إتفضل.

.

.

.

.

حمدالله على السلامة....جه إيه في دماغك..؟!

كنت متوقع على فكرة...!!!

آه صدقني أصل كل حاجة و أنت باصص للسما هتكون متوقعة جداً....

أنت ناسي أن السما دى مكان ربنا...و إن السما دى المكان إللى أنت المفروض تروحه..و ان أنت عايش عشان توصل له....و أن إنت كل هدفك من الأرض إنك توصل للسما...!!!

ماعرفش ده إللى جه في دماغك ولا لأ...!؟!

بس السما المرة دي حاجة تانية خالص....

السما على فكرة دى اهم حاجة في حياتك.....

أيوة صدقني أهم من الاكل و الشرب و الخروج و العلاقات و الناس و كل حاجة ممكن تخطر في بالك....

إسمعني بس..!!!

السما هى الكراسة إللى أنت بتكتب عليها كل حاجة في حياتك...!!!!

( إقرا الجملة دى بالراحة كده...و فكر فيها...)

السما هى الكراسة إللى أنت بتكتب عليها كل حاجة في حياتك...!!!

فهمت إيه..؟!

غامضة شوية..!!!

هبسطهالك..!!

السما هى البوابة إللى هتوصلك لكل حاجة على الأرض...!!!

لسه غامضة..!؟

السما هى أكبر شئ واضح في الكون و بالرغم من كده أسرارك مهما كتبتها مش بتبان فيها....

لسه مش واضحة....

السما هى الورقة الوحيدة إللى بيتكتب عليها بالصوت....

إبتدت توضح...!؟!...

إللى جاية دى هتوضح كل حاجة...

السما هى الوصلة بينك و بين ربنا....

مهما إتكلمت و مهما عملت و مهما قلت و مهما كانت أسرارك...السما بتاخدها وسط السحاب و توصل كل ده لربنا....و بالرغم من إنها في كل حتى بس أسرارك عمرها ما هتبان...

إفتكر إن أنا مفضيلك الأوضة عشان ماحدش يعرف عنك حاجة....تخيل إن أنت في أوضة متر في متر و خايف لا حد يعرف أنت بتقرا إيه....

تخيل بقى السما إللى ما لا نهاية لها...و مهما قلت ماحدش هيعرف....أو هياخد باله أو حتى هيفكر أن أنت أصلاً كل أسرارك موجودة بين السحاب....

يعنى تانى مرة أما رحت تشوف السما...قريت حاجة عن حد...أو سمعت حاجة عن حد...ولا شفت السحاب فيها و بس....

هنا بقى ييجي سؤال تاني لتصحيح الأوضاع....

أنت إستخدمت السما أخر مرة إمتى..؟!

أخر مرة وقفت و بصيت ليها و إبتديت تطلع إلللى جواك إمتى...؟!

ولا أنت زى معظم الناس...بيروح يحكي و يقول كل أسراره لكل الناس...لكن أسراره خافيها عن إللى مش ممكن يقول لحد..؟!

كام مرة كنت متضايق من حاجة.و فضلت تدور يمين و شمال على حد تحكيله و أنت السما مفتوحة قدامك ليل و نهار..

كام مرة كنت فرحان و جريت على موبايلك و كلمت صاحبك...و كام مرة كنت فرحان و جريت على الفيسبوك و وثقت فرحتك دى بستاتيوس (Status)...الناس كلها تدوس عليها (Like)....

كام مرة حبيت تعيط و جريت على أقرب حضن ليك...مع إن ربنا ملي السما كلها دموع....السحاب ده كله ممكن يبقى دموع عشان خاطرك لو أنت جريت لربنا...هو بنفسه هيدمع مطر معاك....

كام مرة إديت ضهرك للسما و بصيت على حاجة في الأرض...

كام مرة حبيت تبني حاجات على الأرض توصل للسما....مش تبني حاجات للسما توصل للأرض..

كام مرة حسست ربنا إنه مش محل ثقة....؟!

كلمة تقيلة أنا عارف...!!

بس مين فينا مش بيعمل كده...

ربنا من حبه لينا خلق لنا السما..اكبر حاجة في حياتنا عشان تكفي كلامنا..و دموعنا و أهاتنا و أفراحنا و ضحكنا....و مهما فضلت تقول و تعيد السما بردو هتكفي...و ماحدش بردو هيعرف حاجة...

لكن أنت بتعمل إيه...؟!

فكر لحظة و شوف..!!

أنت ليه مش بتروح لربنا اول واحد...؟!

أنا هسيبك تفكر....

.

.

.

.

.

.

.

فكرت...لقيت إيه..؟!

إن انت مش واثق فيه...

خايف لا تكون إيده شديدة...

خايف لا يعمل حاجة أنت مش عايزها في الوقت ده....

خايف لا مايقبلكش لأن أنت كلك خطايا...

خايف لأنك مش عارف تتكلم معاه إزاي..

ليه دايماً مع ربنا بنبقى خايفين..؟!

ليه قدرة ربنا حاجة تخوفنا...؟!

ليه دايماً حاسين إن قدرة ربنا دى هتتحول لحجاة ضدنا في الأخر...

كأن ربنا ماستخدمش نفس القدرة دى عشان يخلقنا...و نفس القدرة دى عشان يحبنا...و نقس القدر دي عشان يفدينا...و نفس القدرة دى عشان يصبر علينا...و نفس القدرة دى عشان يجهز لنا مكان... و نفس القدرة دى...عشان يخلق لنا السما...الكراسة المفتوحة طول الوقت مستنية صوت كلامك يكتب عليها أى حاجة...

يكتب ضعف...

هوان...

خطية...

فرح...

شكر..

حتى يكتب إنك مش قادر تعيش...

يكتب إنك زعلان منه..هو بيقبل...

يكتب إنك مش عايز تكلمه...هو بيقبل...

يكتب إنك عايز حاجة..حتى لو كانت تافهة...هو بيقبل....

صوتك و قلبك هما الحبر و القلم....

إستخدمهم...ليه راكنهم على جنب و ربنا مديك حبر و قلم مش بيخلص غي بنهاية حياتك و مديك كراسة واسعة و فيها براح....

ليه خايف تكتب..؟!

ليه خايف تقرب منه....

ليه دايماً شايف القوة....مش شايف الحب....

ليه شايف العقاب...مش شايف الحضن...

عشان أنت شايف إنك تستحق العقاب...و مين فينا مش مستحق...

لكن ماتشكش...

جرب سلم له حاجة واحدة و إكتبها بالبنط العريض في عرض السما..قول له يا ربن انا بسلمك الحكاية دي...و حط تحتها 100 خط أحمر و شوف....أما تسلم هيحصل إيه...أما تثق هيحصل إيه...؟!

قوم دلوقتي الكلام أخدنا...

فكر أنت عايز من ربنا إيه..؟!

فكر أنت مخبي عليه إيه و عايز تقول له...

ربنا بيحب يسمع أسرارك قوي...و بينبسك إنه بيداريها عنك...

أيوة عنك...اوقات كلامك و أسرارك بيبقوا سم ممكن يقتلك.هو مستعد يشرب السم ده بس أنت قول له....

السما كلها بتقول لك ماتخافش و قول....

القمر طالل و بيقول لك أنا واقف ماتحركتش عشان واثق منه...انا بنور و مش بطفي عشان واثق منه...

الشمس بتشرق و بتقول لك أنا واثقة منه...

كل حاجة واقفة ثابتة في السما عشان هى واثقة من المكان إللى هى فيه.. و واثقة من الإله إللى حاططها في المكان ده...

يبقى أنت الإنسان...أحب حاجة لربنا مش واثق لا فيه..و لا حتى في المكان إللى أنت بتكتب عليه...!!!

أنا خلصت...

بس قبل ما أسيبك....

قوم...روح للشباك عندك في الأوضة...

بص للسما..و إكتب لربنا....بصوتك و قلبك...

" أنا بحبك...أنا واثق فيك....!!! "...

و كل يوم إعمل كده....

و كل يوم سلم له حاجة في حياتك...

و أبقى أقابلك بعدين و نشوف...

السما..عرفت تكتب عليها....

ولا حبرك دايماً بتدلقه على الأرض

موضوع رائع جدا بوب شان كما عوتنا فى مواضيعك

تحفة لأ ده اكتر من تحفة وغير تقليدى

عجبنى اوى الاسلوب والمضمون وكل حاجة

ربنا يعوض تعب محبتك

حلوووووو كتييييييييييييير