أنا عارف ومتأكد

أنا عارف ومتأكد انك لما بتشدد
والحمل عليا بتزود
و دة علشان تقوي عظامي

وإنك لما بتجربني
مش غاوي يارب تعذبني
انت بس بتأدبني
وتثبت ع الارض اقدامي

حتى لو اترميت في البير
واتبعت عبد واسير
جوة السجن اتهنت كتير
عارف دي مجرد بداية

مش هسأل ليه انت ناسيني
بطلب بس ايديك قويني
واثق انك هتخليني
حاجة تانية فى النهاية

ولو اخدت مني كل شيء
وفي احزاني ومرضي غريق
مش لاقي جنبي اي صديق
انت لوحدك عندي كفاية

شفت معاك الفرحة اصناف
من حبة ضيق انا ليه اخاف
واثق هتعوضني اضعاف
هبدأ من جديد الحكاية

ولو وقعت فى بطن الحوت
وخلاص قربت على الموت
سامع قلبي من غير صوت
وحاسس باللى جوايا

مش راح اهرب من قدامك
وبإيمان هنفذ كلامك
مادام فى قلبي يارب سلامك
وايديك في طريق ليا حماية

ومهما تجاربك بتوجعني
ولا الف شوكة راح تمنعني
مفيش حاجة هترجعني
وتخلينى اخسر سمايا

بيك انا اقوى من الاول
هدوس على آلامي واتحمل
قوتك في الضعف تكمل
وانت يارب هو رجايا

† † †

الله يعطيك العافيه