انا حبيت الروح المسيحيه.. وتستاهل انها تتحب..

ازيكم ياحبايبي .. انا بنت مكتوبه ف البطاقه مسلمه(رغم اني شايفه الاديان كلها حاجه واحده .. السماحه والاخلاق فيها حاجه واحده وفهمها الخاطئ من قبل اهلها برضو حاجه واحده) المهم.. اني سجلت ف المنتدى ده مخصوص عشان اشهد شهادة حق.. وهي ان اغلب المسيحين..ناس راقيه فعلا.. لان:
-لما حصل حرق للكنايس بلا سبب..ف احداث امبابه.. لم يتم الرد بحرق المساجد بعدها.. اللهم مجموعة مسيحين طلعوا ف مظاهرات وده اقل حق ليهم.. ولم يتم الرد بالعنف.. وماحدث الان (من ضرب بالرصاص الحي لجنود الجيش من قبل المسيحين) طبعا انا ضده تالت ومتلت ومفيش دين عايز القتل .. الانجيل صور الدم على انه له صوت وبيصرخ وربنا بيسمع صراخه وكذلك الاسلام (النفس التي حرم الله قتلها الا بالحق) والنفس اللي ربنا حرم قتلها دي ايييييييييييييييي مخلوق عالارض (الا اللي جاي يهدد وجود كامل وكيان بحاله زي اغتصاب وقتل وتعذيب وتشريد الصهاينه للفلسطينين على ارض فلسطين) .. كذلك التوراه الدم فيها .. خط احمر بلون الدم..لكن اعتقد انه ده ردة فعل (من قبل بعض المسيحين طلعوا بدافع الغضب) على ان دي مش اول مره يحصل هدم لكنسيه.. (لكن برضو ارجع واقول الرد ميكنش بالدم..واللي رد بالدم ده مقراش الانجيل كويس).. وانا اعلم جيدا ان دول لا يمثلوا جميع المسيحين.. لكن انا ملاحظه شئ..اتمنى ان تلاحظوه جميعا معي..وهو ان بغض النظر مين اطلق الرصاص ..سوى المسيحين هما اللي اطلقوا الرصاص عالجيش بلا سبب(وده كلام مش منطقي على مسامع اي طفل حتى) كما يدعي التلفزيون المصري الغير جدير يالاحترام.. الذي يلعب على سزاجة المغيبون..ومش بعيد يكون داخل ف اللعبه اللي هقالهالكوا دلوقتي ..او سواء تم مهاجمتهم خلال مظاهرتهم بالملوتوف من قبل البلطجيه والرصاص من قبل الجيش .. ايا كانت ايه الحقيقه ..ومش مهم (لان الحقيقه .. وخاصة حقيقة الاحداث صعب جدا تتعرف ف الزمن الاغبر ده وف البلد دي..)الا ان ده شئ واضح جدا انه لا يخلوا من عبث امن الدوله.. وريحة تفكير مبارك وحكومته السابقه فايحه قوي قوي قوي .. اولا ايه سبب ان الموضوع ده يطلع دلوقتي تحديدا ومبارك بيتحاكم ..ومخدتوش بالكوا ان بعد الثوره علطول اتخلقت ف لحظه (احداث امبابه) (واعتقد عيب قوي عاللي ميفهمش انها لاخماد الثوره في هذا الوقت)..من امن دوله ومن له مصلحه في اخمادها..مكنش في مشاكل طائفيه بتوصل الى هذا الحد من الهيجان قبل الثوره الا احداث كنيسة القديسين -ومكنتش كمان بالهيجان ده- وبرضو الاقباط مردوش باعنف..واكتشفنا ان وراها الحكومه برضو..بعد مالثوره جت عرت بعض الناس (ودي الحسنه الوحيده الوحيده اللي نتجت عن هذه القومه..(اللي ماتستحقش شرف لقب ثوره لانها مكملتش ومش هاتكمل مع سزاجة المصريين)..لكن غير كده اي خلاف طائفي قبل الثوره كان بيبقى اهبل مبيوصلش لدرجة اطلاق نار من المتظاهرين لا و على الجيش كمان..هنا بقى انا عايزه اسال سؤال .. ايه التوقيتات دي مش غريبه شويه .. مش ملاحظين انها بتطلع لخدمة ناس معينه ف اوقات معينه..لذلك عند نهاية الموضوع وفي خضم هذا السياق هدعوكم دعوه للحفاظ على رقيكم وللحفاظ على الارواح..

- رجعوا للموضوع و تكملة لشهادتي للحق .. بعد هذه الاحداث الجاريه الان.. انا مشتركه ف منتدى الاعضاء فيه تقريبا فوق ال 10 الاف.. ويعتبر اسلامي لان السلفيين مسيطرين عليه وعددهم لا يستهان به فيه.. شفت هجوم كبير من قبل السلفيين خصوصا..(انا مش عاوزه ااقوم فتنه.. بس احقاقا للحق.. ف المقابل شفت المسيحين بيتكلموا بتحضر عالي ومن غير هجوم.. كل كلامهم بيبقى عباره عن اسئله.. زي (انتوا زعلانين ليه اننا نبني كنيسه)..(ممكن يكون رد من وجهة نظر بسيطه .. لان بعض المسلمين اللي زعلانين (وباكد على كلمة بعض) مش زعلانين من بناء الكنيسه وانما من اطلاق النار عالجيش.. الا اني رايت تسامح ف الكلام ومفيش هجوم.. على العكس من السلفيين.. لما شفت كده فكرت اجي منتدى مسيحي عشان اشوف ردود الفعل ايه..وهل ياترى الجو هناك فيه هجوم و صراعات واتهام.. وبناء عليه جيت هذا المنتدى لانه بالصدفه اول منتدى طلعلي ف جوجل .. بعد بحثي عن كلمة (منتدى مسيحي).. وهذا ماوجدته: تم طرح القضيه المفتوحه الان .. الى ان كل الكلام الذي يناقش فيها هو نقل للاخبار فقط.. ولو في تعليق مفيش اي نوع من انواع الهجوم عالاخر بالرغم من الهجوم عليهم ف المنتديات الاخرى وف النت عموما.. واكتر حد زعلان بيقول (حاجه تحرق الدم)..كل ده كوم وماريته والذي جعلني اسجل خصيصا ف المنتدى واكتب فيه هذا الموضوع ..كوم تاني و هو اني لقيت موضوع اسمه (يارب بارك اعدائي).. لا تعليق..

عشان كده انا جايلكوا هنا عشان اقللكوا حافظكوا على رقيكوا ده.. ولو جتلكوا اي فرصه انكوا تهدروا دم او تاذو اي حد باي نوع من انواع الايذاء او تكنونوا السبب ف اشعال فتنه.. ارفضوها فورا.. لان اللي بيحصل ده مش سببه الحقيقي ان المسلمين بيكرهوا المسيحين والمسيحين قرفوا بقى م اللي بيحصلهم.. لا ابدا مش هو ده الموضوع واعتقد ناس اللي بتفكر بتحرر ورحابة افق فاهمه حاجه زي كده..الموضوع ان المطلوب كالاتي(ولو انت او انتي معتبرين نفسكوا بهايم تساق لا راي لها ولا عقل تؤمر فتطيع>> نفذوه : المطلوب هو ان المسيحين يحسوا انهم هفيات.. وناس ممكن ياخدوا على قفاهم وكنايسهم تتحرق وميقدروش يقولوا بم.. وف المقابل يزيطوا ف الزيطه ويطلعوا مع اللي بيضرب نار عالجيش (ودول مش المسيحين لان المسيحين مصلحتهم ايه يضربوا نار عالجيش اللي بيحمي الجميع).. يقوموا المسلمين يحسوا باهانه (اموت واعرف ليه رغم انهم متوجهوش لمسجد مثلا وانما للجيش اللي فيه مسيحي ومسلم)..والشعب المصري لانه شعب يحب المغيبات زي عنيه.. وغلبان لدرجة الغباء يولع بقى ف بعضه) ..هو ده المطلوب.. وهي دي الحقيقه الوحيده الموجوده.. امن الدوله بيلعبوا على عقول المصريين البسيطه وعواطفهم اللي لايحكمها اي منطق..عشان هما عارفين العقليه المصريه ودراسينها كويس.. بالله انتوا متعرفوش يعني ايه امن دوله .. توقعوا منها اي شئ.. وامن الدوله منتهتش زي مالناس معتقده .. واللعب القذر منها مازال مستمر.. ناس كانوا هما الاسياد ودلوقتي بقوا صفر عالشمال.. لازم يعملوا اي شئ عشان يعودوا لعهدهم (مشوفتوش زوجة رجل مهم.. وازاي احمد زكي حس انه لا شئ لما طلع من امن الدوله)..

عشان كده متدوش اي فرصه انكوا تتسببوا ف حرب اهليه والمصالح تتعطل والمدارس تقفل والجريح يخاف يروح يتعالج لا حد يموته ف الطريق.. ملكوش علاقه بالتخلف اللي بيحصل..وافهموا ان دي فتنه ليس اكثر.. مبيقعش فيها غير الغبي والغلبان مش الواعي مش الانسان الحقيقي.. (وطبعا تلات ارباع الشعب المصري عباره عن مغفلين)..بس برضو فيه امل ان الامور متسؤش اكتر.. وهو تفهم الفاهمين..ومنعهم لقلوبهم انها تتعمي..تدبروا ف كلمة فتنه طائفيه.. و يعني ايه حقد وغل وكل واحد يحس انه مهان وكرامته مهانه.. رغم ان ده مش الشعب اللي بدعه مفيش مسلم او مسيحي قاصد يهين كرامة التاني.. لكن اللي بيحصل ان بسبب الغباء من الطرفين مبقيناش عارفين مين اللي ظالم ومين مظلوم والعاطل دخل ف الباطل.. وكل واحد بتخلفه بيجيب الدمار لنفسه وللناس..فيه مسيحين كتير عشان اقول الحق برضو منتهى التخلف والعصبيه وانا شفت بعيني..وكل همهم يجيبوا دلائل على ان ازاي المسلمين بيكرهونا وعاوزين يقتلونا..و ف المقابل المسلمين متحفزين للكفره اللي شكلهم عامل زي الخنازير.. وطبعا لان المسلمين اكتر.. فبناء عليه المسيحين يحسوا ان هما اللي اتاذوا اكتر.. هو ده اللي بيعمل الدمار..الحقيقه ان محدش عايز ياذي حد ولا بيكره حد.. الحقيقه ان كل ماتضيق افقك وتتحيز لجنسك او دينك وعرقك.. كل مابتنزل من انسانيتك وترجع نفسك لورا .. عشان كده الدول العربيه ف اخر صفوف الدول.. لان كل واحد فاهم ان هو الصح.. افرض السلفي ده كان اتولد مسيحي وحياة امي ماكان هيغير دينه.. بس كان هيتعصب نفس التعصب بغباء وكان هياذي الدين المسيحي بغباء.. زي مابياذي الدين الاسلامي..

انا جتلكوا هنا مخصوص لاني حسيت للحظه انكوا ناس عقلها فيه سماحه وعارفه يعني ايه رحمة.. كفايه قوي جملة ربنا بيحبك..اللي بسمعها كتير قوي ف الكنايس والمواقع المسيحيه .. نادرا لما باسمع حاجه زي كده ف مسجد.. لان للاسف غالبية اللي قايمين عالاسلام ناس غلط..دايما باسمع ربنا غفور رحيم.. ربنا بيحب العفو.. لكن جملة ربنا بيحبك دي.. ليها معنى تاني..

استمروا في هذا الرقي.. الذي تثنون عليه.. وانشروا الرساله دي لكل المسيحين اللي تعرفوهم..وشاركوا ف انكوا تقولوا لا.. مش هننساق كما الغنم .. ومش هحرق نفسي بنفسي..لان انا مخي نور..وجوايا سماحه..ومش متخلف.. حره

اقتباس :: وماحدث الان (من ضرب بالرصاص الحي لجنود الجيش من قبل المسيحين) طبعا انا ضده تالت ومتلت

استاذة حرة
شكرا لكلمة الحق التي قولتيها ... شكرا لأن كثيرين يرون الحق وينحازوا لأقربائهم
أنا اؤيدك كل التأييد فنحن ضد سفك دماء الغير

ولكن تصحيحاً لما قولتيه : فهو لم يتم ضرب رصاص على الجيش من قبل المسيحيين
كما انه لم يمت اي مجند متأثرا بطلقات نارية ... وقد اعلن التلفزيون المصري نفي ما تم ازاعته بخصوص مقتل جنود
https://www.youtube.com/watch?v=4yppJZCglVA&feature=player_embedded
الموضوع كله ملفق من خلال التلفزيون المصري بإدعائات كاذبة لتحميل الاقباط نتيجة اخطاء او همجية الجيش المصري والحكومة الحالية .. أو ليداروا تعصبهم الاعمى

نشكر الله الهنا لأنه فضح كذبهم ويفضح
نشكر الله الهنا لأن الكثيرين من الاخوة المسلمين وكثير من الاحزاب الذين كانوا موجودين في ارض الاحداث شهدوا معنا شهادة حق وكثير من الفيديوهات مرفوعة تبين دهس الاقباط .. كذلك اجساد الشهداء وتشوهها جراء الدهس باين وبوضوح

من أجل ما تقولي عنه انه رقي فينا فإن قرار المجمع المقدس في البيان الذي اصدره تعليقا على هذه الاحداث دعى فيه كل شعب الكنيسة ليصوموا ويصلوا 3 ايام ليتمجد الله وليتدخل وليرفع الظلم وان يحمي بيته ويحمي مصر
وسيتمجد الله الهنا

شكرا لكي مرة اخرى ربنا يكشف للجميع الحق ويحمي هذه البلد المقدسة