اعترافا منى بقداستها

انا فتحت الموضوع ده لانى عايزة اقول لتماف ايرينى كل سنة وانتى طيبة بمناسبة عيد انتقالك

للسماء. وكمان اعترافا منى بمعجزة عملتها تماف ايرينى معايا . البداية كانت ان واحدة صاحبتى اديتنى كتاب ليها

علشان اقراه وفعلا الكتاب شدنى ليها جدا وحبيتها اوى من خلال اللى قريته عنها وبعدها بيومين

ظهر يوم الاربعاء 26/10/2011


فى اليوم ده كان والدى مسافر واخويا كمان مسافر وكنت لوحدى فى البيت مع ماما

وفى حدود الساعة 12 وتلت ظهرا اصيبت ماما بزيادة رهيبة فى دقات القلب مع هبوط تام

فى الضغط والم شديد فى الصدر وكان ملمسها زى التلج وكنت شايفاها قصادى بين الحياه والموت وكنت عاجزة تماما

عن التصرف لانى لوحدى وجيت جهاز الضغط علشان اقيس لماما الضغط وجدته 0 كررت

االقياس اكتر من مرة ومقدرتش استحمل انفجرت فى البكاء وقررت انى اقيس الضغط لنفسى

قولت يمكن العيب فى الجهاز علشان ادى لنفسى الامل ولكنى وجدت ضغطى مرتفع فعرفت

ان الجهاز شغال حاولت اتصل بالدكتور مكانش بيرد عليا وماما مش قادرة تنطق اتجننت

مكنتش عارفة اتصرف ازاى فكرت فى اى حد يعرف يساعدنى وفعلا

اتصلت بجارنا علشان يجهز عربيته علشان نوديها للمستشفى وفعلا الراجل قالى انه هيستنانا

فى العربية وفى الوقت ده صليت بينى وبين نفسى للقديسة الجديدة اللى كتابها دخل بيتى من يومين

وقولتلها انا مش عايزة ماما تروح المستشفى وعايزاها تبقى كويسة وعايزة منك علامة انها تقولى

انها بقيت كويسة ومش هنروح المستشفى خصوصا انى مهما كان مش هعرف اتصرف فى

المستشفى لوحدى ومش عايزة حد غريب ييجى معانا..... وبعد صلاتى مباشرة لقيت التعب زاد جدا جدا

وماما قالتلى لازم نلبس ونروح وفعلا انا لبست ولبستها وخدت معايا الفلوس عشان المستشفى

ولكنى كنت فى قمة الخوف وفى قمة الغضب من تماف ايرينى وقولتلها بالحرف وانا بعتذر

طبعا ليها على كلامى: انا مش عايزةكتابك عندى فى البيت انا اول ما هشوف صاحبتى لازم هرجعه

كل المعجرات مع الناس دى كلها وانا لا انا كمان مش عايزة الكتاب.

انا عارفة ان لسانى كان طويل ومكانش يصح بجد انا اسفة يا تماف ايرينى

المهم بعدها بلحظات قليلة لقيت المفاجأة الكبيرة لقيت ماما بدأت تصحصح وقالتلى بالحرف:

انا بقيت كويسة خلاص مش هنروح المستشفى الالم كله طار. انا اتذهلت ومكنتش مصدقة اللى بسمعه سألتها عن اللى حصل بالظبط

قالتلى انها شعرت بكل الالم وزيادة الدقات بتتسحب من جسمها واتجمعت كلها فى مكان واحد

وطارت ومتعرفش ازاى طارت. ولقيت ماما بقيت احسن كتير مسكت جاهز الضغط عشان اتأكد

لقيت الضغط اصبح 123 على 82 ونبضات القلب 89 من بعد ما كان الضغط صفر

انا مش عارفة اشكرك ازاى يا تماف ايرينى انتى انقذتى ماما وانقذتينى معاها سامحينى على

كلامى وعلى غلطى فى حقك . انا عايزاك تكونى معانا فى بيتنا انتى من دلوقتى شفيعتى الجديدة

ساعدينى فى اللى جاى وعايزة خطواتك تسبق خطواتى. كل سنة وانتى طيبة

الف سلامه على مامتك ياايتن ماتشوف شر ان شاء الله والله يخليلك هيا ومايحرمك منها ابدا

بس انا عندي سؤال

تماف ايرني دي مين ؟؟؟ قصدك على مروه ؟؟؟ ولا وحده تانيه ؟؟

معجزة رائعة من أمنا تماف ايريني.. أنا كمان عندي كتابها اشتريته من الكاتدرائية..


لا يا رشا مش أنا (ديه القديسة تماف ايريني).. وعموما.. أنا اسمي فبرونيا يا رشا.

اها

ايوه انا عارفه انو النك تبعك فبرونيا بس انا سالت لانو قبل فتره كان النك تبعك تماف ايريني

عشان كدا حسبتها انتي ^_^

يارتني ابقى ربعها بس يا رشا.. نفسي اكون واتمنى بجد زايها...



انا صليتلك امبارح يا رشا..

ياقلبي انا تسلميلي عالصلاه

وانا والله بدعيلك من قلبي انو ربي يريحلك قلبك وبالك

أنا فعلا يا رشا تعبانه جدا الفترة ديه.. ومحتاجة لدعواتك وصلاوات كل الناس.


ربنا يخلينا لبعض.

ربنا معاكى يا فبرونيا ويعينك

اقتباس :

الف سلامه على مامتك ياايتن ماتشوف شر ان شاء الله والله يخليلك هيا ومايحرمك منها ابدا

وميرسى يا رشا كتير على ذوقك
ربنا يكون مع الجميع