مش شايفها هى فين ....no comment

ده حوار بين أب وبنته ، البنت كبرت ودخلت الكنيسة وبتسأل باباها عن الحاجات الى شايفاها فالأب بيقول :......................................................

بمنتهى البراءة سألتنى بنتى ماريان...

فى أربع خمس أمور مش فى كتاب المهرجان

.. قالتلى بابا يا بابا مش انت يا باب بتقول رأيك من غير أى مجاملة أو اعذار ..

طب أنا يا بابا سمعت أبونا بيقول أنك هتخش النار ...

زى الناس التانيين الوحشين الثورجية الى علطول معترضين ..

قولى يا بابا يعنى أيه امين أسرة ويعنى ايه مساعد الأمين ..

وليه أبونا بيتخانق مع الاستاذ هما دول يابابا مش مسيحيين

..ويعنى ايه غفير ..

يعنى ايه بواب وليه سرير .

. يعنى ايه رقيب على الدواليب ..

يعنى ايه الى يغيب يبقى حسابه عسير ..

باب هو فى الكنيسة فى ..مدير ..

وايه الكورة وايه البينج وايه الطايرة وايه الكونكت ..

هو احنا يا بابا فى كافى نت

.. و ايه التصوير و ايه التمثيل ..

بابا هو التمثيل ده يعني الناس بتمثل علي بعض ..

و انت يا بابا بتمثل معاهم و لا انت مش معاهم

.. و يعني اه اصحاب عاملين شلة ..

ده غير الشلة التانين الوحشين ..

بابا هو ايه الكانتين و ايه التقدير وايه المكافاة و ايه التكريم هو احنا يا بابا في شركة و ليها مدير ..

و ايه كل المكاتب ديه يا بابا انا حاسة اني في وزارة كبيرة ..

و فيها الفراش و المدير و الوزيرة ..

قولي يا بابا يعني ايه حل .. و يعني حلو ..

و مين اللي يدي الحل .. و مين اللي يقول ده حلو .. و

مين الى يقول ده يخش وده ميدخلش ..

بابا .... هما مين الناس اللي مش مسيحين ؟!!!!!!! هما دول يا بابا .. المسلمين ...

طب بلاش دول .. يعني اه طوائف يعني ايه بروتستنت ..

يعنى ايه كاتوليك .. يعني ايه انجيلين ..

هو احنا يا بابا مش كلنا مسيحين .. و مع المسيح داخلين ..

طب يعني اه مفاتيح .. و يعني اه تصاريح .. و يعني اه دواليب ..

و مين اللي حط الخشبة فوق خشبة علشان يعملوا صليب ..

و ايه الحمامة الطايرة فوق المنارة .. هي ديه العذراء يا بابا .. و لا ده ليزر و اضاءة ..

و ده فعلا ظهور و لا زي ما بيقولوا التانين .. ده مجرد لعب بالنور ..

بابا انت معايا .. انا شايفة ناس بتقول كفاية ..

و ناس مبسوطة و لابسة جديد ..

و ناس تانية مرمية و هدومها غرقانة بالدم في ليلة العيد ..

هو انتوا متعودين كده في كل عيد .. تنقسموا مجموعتين .. شوية يبقوا مبسوطين و للبس العيد لابسين .. و تانين غارقنين في دمهم و علي الارض مرميين .. قولى يا بابا يعنى ايه تناول ..وهو التناول ده أى حد ياخده كدة من الناس .. من غير ما يقدم لأبونا أى طلب أو ألتماس .. طب بلاش ده انا شفت الفراش بيوصل طلبات لأبونا فى البيت .. فاكر يا بابا زمان واحنا قاعدين من سنين فى البيت .. لما حكيتلى قصة الفلاحين الى بيشتغلوا عند ريسهم مش عند صاحب الغيط .. هما بقى الفراشين دول بيشتغلوا عند أبونا ولا عند صاحب البيت ؟!!!!! .. طب بلاش ده انا شفت يا بابا من يومين شماس صغير لابس تنيته .. وسرحان فى وحدته .. وغرقان فى دمعته .. علشان المعلم مش مديله فرصته .. هو لازم الواحد علشان يحفظ ألحان ياخد درس مع المعلم مينفعش من غير فلوس ببلاش كدة يتعلم .. يتعلم ألحان مش أنه يمسك المايك ويبقى فنان .. طب قولى يا بابا يعنى ايه فى الكنيسة فى أسر .. وهى الأسر ديا عاملة يعنى زى الأسر الجامعية .. داخلين مع بعض فى سباق ولا أكنهم فى مسابقة عالمية .. ولا زى الأسرة الى عندنا فى البيت .. أنا وأخويا وماما وأنت يا بابا .. عمر ماحد غلط فى التانى ولا تانى استنى على الواحدة للأولانى .. ده انا عمرى يابابا مشفتك بتتخانق مع ماما .. وعمرى ماشفت أخويا بيقول مش مهم أختى .. ويانا يا نفسى .. وهعمل الى فى نفسى .. علشان انت علمتنا من صغرنا ازاى نبقى ايد واحدة .. علشان نمجد اسم ربنا .. ونحقق وصيته وننفذ كلمته .. قولى يا بابا يعنى ايه اختلاط .. هو الولد لما يقف مع البنت يبقى حرام .. ولو كلمها ده يبقى اسمه إجرام .. قولى يا بابا أنا سمعت كدة من اسبوعين انه كان عندكم اتنين للكهنوت مترشحين .. هما دول يابابا زى التانين .. طب خلاص لحسن أخش النار معاك .. ايه بتبصلى باستغراب كدة ليه .. بتقولى عرفتى منين !!!! .. منا كنت هناك معاهم ويا الزحمة الى راحت .. بس سمعت هناك كلام ليه العجب .. قام واحد قال لأ يا سيدنا عندنا افتقاد .. والتانى قاله ده ابونا عندنا بيبات .. والتالت قام قاله احنا كلنا فى الرأى متفقين .. وعمرنا ماكنا على حاجة مختلفين .. وقام واحد تانى قاله بص يا سيدنا انا مش من الكنيسة ديا بس الصراحة الناس دى تستاهل كل خير وهما مش عايزين بس غير كاهنين .. ساعتها سيدنا اتنرفز وقال كلامه وعرف كل واحد تمامه .. قالنا انتوا بتضحكوا على مين عيب ده انا ابوكوا .. ده انا فى الشغلانة دى من سنين .. وبعدها روحنا كلنا يا بابا متضايقيين .. طب سيبك من دى .. قولى يا بابا وانا داخلة الكنيسة من يومين شوفت أكشاك مرصوصة على الجنبين .. هى دى يا بابا عاملة زى أكشاك العيش .. ولا دى علشان فيها نعيش .. طب بابا هو ينفع اخد كشك انا وصحباتى البنات .. نلعب شوية ونقول حبة حاجات .. ونرسم حبة رسومات .. مهو مش لاقيين مكان نقف فيه مع المسات .. مهو الاكشاك على كلى كل الجنبات ..عارف يا بابا انا حاسة انى فى وكالة .. فيها الزبون والبياعة .. وناس بتشترى وناس بتبيع فاكر يا بابا الباعة الجائلين .. الى كانوا زمان فى الهيكل قاعدين .. يا خسارة يا بابا .. ايه بتبصلى كدة ليه .. منا سألت عم فرحان قالى دول هيبيعوا فيها القربان .. يعنى هو القربان من غير أكشاك ميتبعشى ..والرحلات من غير أكشاك متطلعشى .. عارف يا بابا أنا حاسة انى هاجى بكرة هلاقى ورقة مكتوب عليها كشك للإيجار .. والحق قبل الزيادة فى الأسعار .. قولى يا بابا فين كنيستنا ؟!!!!! .. انا الظاهر غلطت فى العنوان .. ده كل حاجة هنا بقت ببيان .. قولى يا بابا يعنى ايه بوظوها يا بابا .. ومين دول الى بوظوها .. وانت كنت فين لما بوظوها .. بابا هو مين الكبير هنا طبعا" بعدربنا .. يعنى لما اعوز اتكلم اتكلم مع مين ..يا ترى مع ابونا ولا مع الامين .. ولا أمين اللجنة ولا اى حد من اللجنة ولا الأمين العام ولا مساعد الامين ولا لاامين الاسرة ولا مساعد امين الاسرة ولا امين المرحلة ولا الخادم المساعد للأمين ولا خادم الفصل ولا المساعدين .. قولى أكلم مين .. اقولك يا بابا انا عرفت هكلم مين ..ده انتوا عندكم رتب كتيرة قوى هنا .. أنا .. أنا هكلم ربنا .. ايوه منى ليه وهو الى هيكلمنى وهيفهمنى وهكلمه عنكم وهو اكيد مش هيسيبكوا كدة .. بابا ده أنا دخلت الكنيسة من يومين .. شوفت اتنين بيصلوا وعند الهيكل ساجدين .. ويعد دقتين أخرج ألاقى واحد بيشتم والتانى بيسب الدين .. بابا هو ربنا بيضحك عليه .. طب ليه ربنا ساكت على كل ده .. اكيد فى سبب ورا سكوته وصموته .. لكن زى ماقولتلك هكلمه عنكم .. وهم مش هيسيبكم .. وهو مش هيسيبكم كدة


+++++++++++++++++++++++++++++++++

By popshan




..............................................................................................................................................



نجحت الكنيسة على مر السنين في تربية جيل ذاق النظام والترتيب حتى أيقن أنها عمل مؤسسي متكامل .. كالإدارة .. أو قل كالوطن .. وهكذا طالتها الثورة


---------------------

يعني بره تيبيكال جوه .. ويبقى المشوار هو هو

د بشرى عجبان!!!!!!!!!

رائعة جدا جدا