انتى برنسيس بأقل التكاليف

انهردة هعلمك تهتمى بنفسك ازاى حتى لو معكيش فلوس

لو عايزة يكون عندك لوشن وغالى عليكى

جيبى 1- علبة كريم جليسوليد ٨٠ جرام

2-ازازة ماء ورد من العطار اسمها المصرية دى ارخص نوع ب ٣ ونص علبة كبيرة اوى

3-ليمونة

هتفضى الكريم فى علبة ليها غطا اعصرى الليمونة عليها وضيفى ٢ فنجان ماء ورد بس بالراحة معلقه معلقة وقلبى

هيتكون عندك احلى لوشن سريع الامتصاص يغذى الجلد ويفتح بسبب الليمون ويعطر بسبب ماء الورد

لو عايزة تكملى جمال اللوشن بتاعك يمكنك اضافة معلقة زيت زيتون لمزيد من الترطيب

ولو عايزة يكون عندك بادى سبلاش يعطر جسمك سهلة جدا وببلاااااش

1- هتروحى للراجل بتاع العطور قوليله عايزة ب ٢ جنية بنفسج مائى ماااااائى هه مش زيتى

عشان احنا عايزينه يدوب فى الماء

2-ومن العطار جيبى بجنية دم غزال بس روحى لعطار عنده ضمير عشان مش يغشه

3-وب ٢ جنية قشر رمان مجفف

الطريقة اغلى ٢ فنجان ماء مع مقدار معلقتين قشر رمان متنسيش تغطيه ولما يغلى اطفى النار وسبيه يبرد خالص

لما يبرد صفى قشر الرمان كويس بشاش عشان مش عايزين اى شوائب

هتحطى الماية دى فى اى سبراى عندك لو معندكيش اشتريه ب ٢ جنيه ونص من محل العطور

ضيفى للماء مقدار معلقة من ماء البنفسج ومقدار اد رأس عود الكبريت من دم الغزال

رجى السبراى كويس قبل الاستخدام ويحفظ فى التلاجة

السبراى دا هيعطر الجسم بريحة ثابتة طول اليوم بسبب البنفسج وهيشد الجسم جدااا بسبب قشر الرمان وهيديكى لون روز حلو كأن جسمك كله دموية Very Happy

بسبب دم الغزال

ولو عايزة يكون عندك بادى باودر هاتى من العطار ب ٢ جنية نشا وب ٣ جنية زيت ورد

الطريقة املى اى علبة باودر قديمة بالنشا ( مقدار ٢ فنجان ) + معلقة صغيرة جدا زيت ورد + معلقة ارز نى

اقفلى العلبة ورجى كويس جدا

النشا بتعمل وظيفة بودرة التلك بالظبط لكن بدون اضرار لان بودرة التلك دى بتبوظ الرئة

زيت الورد للتعطير

الرز النى ملهوش وظيفة غير انه هيمنع تكوين اى كلاكيع من النشا وهيخليها مفرولة

طريقة الاستخدام للى مش عارفة :

بتاخدى الشاور بتاعك عادى وتنشفى جسمك كويس وادهنى كل جسمك بلوشن الجليسوليد طبقة رقيقة مش تكترى

بعدها رشى على كل اماكن العرق من البودرة بتاعتك

رش مش دعك عشان كدا قولتلك حطيها فى علبة بودرة قديمة بتكون فيها خورام

بعدها رشى على جسمك كله كله من السبراى متخفيش امن جدا حتى للاماكن الحساسة

وطبعا متنسيش الديودرنت ولو مش بتحبى ادهنى نقطة من كريم زنك اوليف بتاع الاطفال لانه بيمنع العرق ويحمى الجلد

لو حبيتى تعملى سبراى معطر لشعرك ضيفى معلقة بنفسج مائى + فنجان ماء + معلقة جلسرين سائل رجى كويس قبل الاستخدام ورشرشى على شعرك كله

اهو عملت اللى عليا عشان مش يكون ليكو حجة تهتموا بنفسكو بأقل التكاليف عايزين نبقى مزز بئة Very Happy

الموضوع مجهود شخصى مش منقووول

اى سؤال انا موجودة Smile

اهلا يا كاسكو flower

وحشتينا .. ووحشتنا مواضيعك الحلوة دي

يسلمو ايديكي ويعطيكي العافية على مجهودك بكتابة الموضوع 100

» دورة تنمية مهارات محاسبة التكاليف بإستخدام الحاسب الالي (Protic For Training )
» انتى لؤلؤة نادرة
» برنامج يغنيك عن اى انتى فايروس
» انتى اللى قلبى حبها
» عايزه تعرفي انتى عصبيه ولا لا؟؟؟؟؟