للأسف كتير مننا بيبني أسوار يخفي وراها حاجات كتير
وبيتصرفوا كأن مفيش جروح ولا آلام في حياتهم الشخصية
تعالوا مع بعض نشوف ليه ده بيحصل ؟
ليه نخبي ونداري ؟ وليه نعلن ونتكلم ؟
ليه نخاف من مواجهة ماضي كان متعب بالنسبة لنا ؟
+++++++++
أي انسان فقد السيطرة على حياته
أو الانسان اللي عايش بعيد عن ربنا
في طريقه للهلاك لو متكلمش وأعلن احتياجه للمساعدة
كتير من الناس بيتألموا وبيتعبوا كل ما بيفتكروا موقف معين
او مشهد معين او حادثة أو أمور صعبة مروا فيها قبل كده
احيانا مينفعش الكلام خالص عن الأمور دي
علشان ابدا الكلام ما هيوصف قد أيه كان الامر ده صعب
ده يخلينا نفكر ونقول انه لازم نتعلم ازاي نتعامل
مع جروح الماضي ومعالجتها
+ فيه ناس احيانا بتتعامل مع كده بإنها بتسكت مبتتكلمش ..
بتدفن الجروح على أمل انهم ممكن ينسوها
فيه كتير من الناس عايزين شفاء داخلي
وبرغم ان ربنا عايز يشفي لهم مشاعرهم
لكن فيه اساسيات وخطوات انا شايف انها ضرورية ومهة
لازم احنا ناخدها بنفسنا علشان ننال الشفاء ده
بمعنى
اني لو عايز شفاء لمشاعري
( مهما كان نوع المشاعر وسببها )
مشاعر حزن جوايا او إحساس بجرح قديم
أو اي حاجة صعبة مريت بيها .. يبقى لازم
1- إعلان الاحتياج :
أعلن احتياجي للمساعدة لكده
ومنكرش اني محتاج معونة
منكرش اني محتاج حد يقف جنبي
وكأن مفيش حاجة واتظاهر اني كويس
للأسف كتير مننا بيبني اسوار يخفي وراها حاجات كتير
وبيتصرفوا كأن ابدا مفيش جروح ولا آلام في حياتهم الشخصية
طب ليه مهم اني أعلن عن جرح قديم مش قادر انساه .. ؟
اكيد هتكون الاجابة .. علشان بنفكر في رد فعل الناس ..
وتفكيرهم فينا بعد كده ... بنخاف من رفضهم لينا او ان المعاملة تتغير
او انهم يفهمونا غلط .. أونخسر حب شخص معين لو عرف الظروف
اللي مرينا بيها
2- الاعتراف بالخطأ :
من المهم ان يكون فيه حد قريب مني قوي يشاركني اللي حصل في حياتي
علشان مجرد الكلام بس مع الشخص ده عن اللي انا بحس بيه
( حتى ولو من غير حلول ) ده لوحده هيريحني من جوايا ..
ده مش معناه اني بكلامي معاه يبقى كده برمي حمولي عليه
لا .. خالص .
بس ده يخلينا نقول اننا نخلي بالنا ونكون حكماء
في اختيارنا للشخص اللي هنتكلم معاه ويسمعنا ويعرف عننا
الحاجات اللي محدش عارفها
لازم يكون شخص موثوق فيه قوي
شوية الموضوع صعب مش سهل
وأكيد ده رد فعل طبيعي .. اننا نخاف
بس صدقوني ده في البداية بس
لكن بعدها هحس اني بتكلم وكأني بحكي عن مشكلة حد تاني
ده علشان من جوايا بقيت مرتاح بعد ما اتكلمت
الراحة دي معناها شفاء من تعب اللي فات
شفاء من كل مشاعر متعبة وحزينة
ومع ان كتير من اللي بيحصل معانا من مشاكل او ظروف صعبة أو جرح من اقرب الناس .. بيكون خارج عن إرادتنا
لكن مش هنكون صح .. أو مش هنعيش حياة كويسة
لو سمحنا للمشكلة دي تعيش جوانا وتتسلط علينا
علشان كده .. لازم نواجه مشاكلنا .. أتعابنا .. جروحنا
نواجه مشاعرنا اللي انجرحت من أقرب ما لينا ومنسكتش
المواجهة
هتكون بداية لحياة نفسية مستقرة ..
وحياة اجتماعية سليمة
وحياة روحية قوية
من أجل حياة أفضل
اعلى كل موضوع بالمنتدى
موضوع: يشفي الاعماق (2) 
السبت 13 سبتمبر 2008, 9:26 pm
